من 25 سنه وأنا شغال في مجال التصوير
مكنتش عارف أميز اللي سمعته من شوية دا كان حقيقة ولا خيال على كل حال دخلت تاني وكملت مشاهدة في الفيلم
فجأة وأنا مندمج سمعت صوت كلاكس عربية واقف قدام المحل أتنف/ضت من مكاني خرجت بسرعه كان الوقت عدى ١٢ بعد منتصف الليل
لقيت عريس وعروسة في عربية مكشوفة
عربية آخر موديل عريس وعروسه شكلهم ولاد ناس
ابتسملي العريس وقالي
أحنا كنا معديين من هنا وفي طريقنا للفندق اللي هنقضي
فيه شهر العسل ولما شوفنا اليافطة قررنا نييجي نتصور عندك
قولت في نفسي يا فرج الله اخيرا زباين ومش اي زباين شكلي هطلع الليلة بمبلغ محترم بقيمة سنه شغل أقدام
قولتله وانا ببتسم
أهلا وسهلا بالعرسان نورتوا الاستوديو بتاعي
دخلوا جوه عندي وفضلت أصور فيهم
العروسه كان معاها بوكية ورد خليتها تمسكه بإيديها والعريس وقف وراها وحط إيده على وسطها
ممكن تحرك راسك يمين
شوية عروستنا الحلوة
هتمسكي إيده وتبصي ناحيته مع إبتسامه خفيفة
بس كدا أثبتوا
أول ما ضغطت على زرار الكاميرا وضىىرب الفلاش في وشهم
فجأة ملامحهم أتبدلت والذعر ظهر على ملامح العروسه
وقالت لعريسها
كفاية كدا هنتأخر
بص لساعته وقال فعلا فاضل عشر دقائق
قولتلهم وأنا مستغرب
هو في حاجة
لأ لا مفيش كفاية الصورة اللي أخدناها هنا
يعني خلاص مش هتكملوا باقي الألبوم
لأ طبعا هنكمله بس مش هنا
اومال فين!!
تعالى معانا
على فين
في كوبري قريب من هنا هنتصور عنده
تصوير خارجي يعني
